د شیخ زاید پوهنتون خان عبدالصمد خان اڅکزي د غونډو په تالارکې د ژبو ادبیاتو پوهنځي ادبي څپ غونډه ترسره شوه.
د ادبي څپ کالنۍ غونډه چې مشر مېلمه یې د سیمې په کچه وتلی او منلی شاعر پیرمحمد کاروان و، د ژبو ادبیاتو پوهنځي استاد پوهنمل ظاهر شاه زهیر د پرانېستې وینا ترڅنګ مېلمنو ته ښه راغلاست ووایه.
یاده ادبي غونډه پردوو برخو وېشل شوې وه، لومړۍ برخه یې د پښتو څانګې څلورم ټولګي محصل انارګل فرهادي پرشعري ټولګه (چې درنه تاو کړمه دا غبرګ لاسونه) مخکتنه وشوه، په لومړي سرکې شاعر پیرمحمد کاروان د کتاب په محتوا هر اړخیزو خبرو ترڅنګ ادبي او هنري اړخ وڅپه.
ورپسې د ژبو ادبیاتو پوهنخي استادانو او محصلانو هریو استاد ګل احمد محبت، استاد ظاهر شاه زهیر، فرهاد الله الحان، تسلیم هلال، نصیر شهاب او بسمل پریادې شعري ټولګې نظرونه ورکړل، د کتاب مثبتې او منفي خواوې یې ګډونوالو ته وروښودې.
د ادبي څپ غونډې دویمه برخه کې ازاده مشاعره وشوه، چې د مېلمانو شاعرانو ترڅنګ د شیخ زاید پوهنتون او په ځانګړې توګه د ژبو ادبیاتو پوهنځي شاعرانو محصلینو خپل شعرونه واورول.
د شیخ زاید پوهنتون د ژبو ادبیاتو پوهنځي استادان او محصلین هر کال د پوهنتون ادبي څپ کالنۍ غونډه رابولي، چې د سیمي په کچه لیکوالان او شاعران پکې ګډون کوي. د ژبو ادبیاتو پوهنځي او په ځانګړي ډول د پښتو څانګې محصلینو لخوا پکې خاطرات او شعرونه ارایه کیږي.
ادبي څپ ناسته د سرلوړي او اباد افغانستان دوعایی په ویلو پای ته ورسیده.
