د مهندسي څانګې لنډه تاريخچه

کله چې پر (۱۳۸۱) لمريز کال شيخ زايد پوهنتون له پيښاوره د افغان پوهنتون په نامه خوست ته انتقال شو، د انجنيري پوهنځي په چوکاټ کې يي مهندسي څانګه نه درلوده. له دې وړاندې د انجنيري پوهنځي په چوکاټ کې يوازې سيول څانګې فعاليت درلود. د تخنيکي او مسلکي زده کړو د مينه والو د هيلو او اميدونو غوټۍ هله ګل شوې، چې له پيښاوره افغان پوهنتون په خوست کې د شيخ زايد پوهنتون په نامه د افغان بچو لپاره د پوهې ډيوې بلې کړې او د انجنيري پوهنځي په چوکاټ کې مهندسي څانګې د ( ۳۴۳۲/ ۴۸۲۱) حکم  (۱۳۹۳-۷-۳۰) نېټه هم رسماً په فعاليت پيل وکړ.

د يادې پوهنځې په چوکاټ کې  د مهندسي څانګې د يو علمي مرکز په توګه د علم تږي په (۱۳۹۱) لمريز کال کې په ځان را ټول کړل. هغه مهال د مهندسي څانګې ګوته په شمار علمي کادرونه درلودل؛ خو د وخت په تېرېدو سره يې علمي منزل پر لور چټک مزل پيل کړ. کله چې يادې څانګې د پوهې او هنر څراغونه بل کړل؛ نو مينه وال يې تتې رڼا ته ناست وو؛ خو د دې څراغ رڼا دومره ډېره او روښانه شوه، چې تر لرې لرې يې ډېرو ته منزل مقصود پر لور د مزل لارې روښانه کړې. اوس مهال له لنډ مزل وهلو وروسته ياده څانګه (۶) علمي کادرونه لري، چې د هېواد مختلفوسيمو ته د خپل علم رڼا ويشي.

سربېره پر دې چې د مهندسي څانګې له پيله تر دا مهاله په سلګونه ځوانان د علم او پوهې په زېور ښکلي کړي، ورسره يې د خپلو علمي کادرونو ظرفيت لوړونې ته هم جدي پاملرنه کړې ده. دا مهال د يادې څانګې ټول کادرونه د ماسټرۍ او دوکتورا په کچه زده کړې لري او هڅه کوي چې لا نور د علم په زيور سمبال شي. دغه څانګه يو تن دوکتور او څلور تنه ماسټراستادان لري.

اوس مهال د مهندسي څانګې خپلو محصلانو ته يو عامه کتابتون چې د پوهنتون په سطحه دي او ښه تدريسي او تحصيلي چاپيريال په واک کې ورکړي او استادان په تدريسي چارو کې د معاصرې ټيکنالوژۍ څخه ګټه پورته کوي او هڅه کوي، چې په خپلو تدريسي فعاليتونو کې د شاګرد محورۍ او د موخو پربيناد زده کړې څخه ګټه پورته کړي.

د مهندسي څانګه په پام کې لري، چې د لا ښه خدمت په موخه داسې محصلين وروزي چې د هرډول ودانيو ډيزاين په معياري ډول ترسره کړاي شي ترڅو د دې کړيدلي هيواد د ابادی او سمسورتيا لامل اوباعث شي.

 د مهندسي څانګې لرليد (Vision)

مهندسي څانګه خپل ټول امکانات په موثر ډول په کار اچوي ترڅو ټولنې ته داسې کادرونه وړاندې کړي چې د هيواد او سيمي په کچه د مهندسي او ښار جوړونې په رشته کې مثبت تغيرات راوړي او خدمتونه وړاندې کړي.

 د مهندسي څانګې ماموريت (Mission)

مونږ محصلان په تعليمي، څيړنيزو او تخليقي هڅو کې داسې ښکيل ساتو؛ ترڅو د دې توان ولري، چې د دوامدارې زده کړې او ښو خدماتو په واسطه ښې دندې او معنا لرونکي ژوند ولري، په داسې حال کې، چې د ټولنې، هيواد او نړۍ په اقتصاد، چاپيريال او د ټولنيز ژوند په وده کې رغنده رول ولوبوي.

 د مهندسي څانګې موخي

د مهندسي څانګې فارغ محصلان به لاندې وړتياوې ولري.

1.  د يوې ودانۍ د مهندسي ډيزاين د مهارتونو په درلودلو سره به په دولتي او خصوصي سکتورونو په بېلا بېلو برخو کې به دندې ترسره کړي.

2.  زده کوونکي به وکولي شي، چې د مهندسي ډيزاين علومو پر اساس به معياري ودانۍ ډيزاين او د ډليز کار مهارتونه، د تخليقي، بحراني، نوښتګر، تحليلي فکر مهارتونه او د ښوونيزې رهبرۍ مهارتونه زده او په ټولنه کې ترې سالمه استفاده وکړي.

3.  د ودانيو ساختماني نقشو پلي کول

4.  د ودانيو براورد او د هغې د قيمتونو تحليل

5.  د پايداره معياري ښارونو په پلان ګزاري کې د مسلکي اشخاصو په توګه ونډه اخيستل

6.  د ودانيو پايداره داخلي ډيزاين

7.  په مهندسي کې ريسرچ او تحقيق

8.  د ودانيو لپاره د غږونو، روښنايئ، تهويئ او داخلي تودوخيزي هوساينې محاسبه

9.  د ودانيو د ډيرو مغلقو بڼو د طرحې او ترسيم مهارت

 ودانۍ يا زيربينايي اړتياوې

د مهندسي څانګه اوس مهال ۵  تدریسي ټولګي لري؛ خو د تدريس لپاره يواځې درې (۳) خونې په واک کې لري. په اول منزل کې ۳ تدريسي خونې، چې محصلانو ته ځانګړې شوي دي او په همدې منزل کې د څانګې آمريت هم شتون لري. د درسي حونو د کمبود له امله د څانګې د ټولګيو مهالويش په ورځ کې دوه مهاله تنظميږي. همداشان څانګه د آمريت لپاره يو اطاق لري چې د څانګې آمر او استادان ورڅخه يوځاي ګټه اخلي.

 د مهندسي څانګې د علمي پروګرامونو پيژندنه

  د علمي څيړنې، نوښت او انتقادي تفکر عام کېدنه

د مهندسي څانګې علمي کادرونه پر ترفيعاتو سربيره پر نورو مهمو او بکرو موضوعاتو څيړنې کوي. علمي څېړنې، نوښتونه او انتقادي فکر عام کېدل د  اکاډيميک چاپيريال د لا غوړېدا لپاره بستر برابروي. د مهندسي څانګې علمي کادرونه هڅه کوي چې په خپلو څيړنو کې او هم په اداري چارو کې پورتنيو پديدو ته ځانګړي ځاي ورکړي.

 علمي څيړنه

په يو علمي چاپيريال کې څيړنه حياتي ارزښت لري. د پوهنتون له استاد هيله کيږي چې د خپلو څيړنو او تحقيقاتو پر مټ د ژوند ډېرو ستونزو ته ځواب ووايي. د مهندسي څانګې علمي کادرونه او رهبري د ژوند ډېرو ستونزو ته د ځواب ويلو په پار خپلې علمي هڅې ګړندۍ کوي.

 کړنلارې:

1)   د علمي څيړنو پراخول او په بااعتباره ژورنالونو کې يې خپرول.

2)   د استادانو لخوا د HEDP او لوړو زده کړو وزارت ته د تحقيقي پروپوزلونو ليږل.

3)   نويو مقررو شويو استادانو ته د ځانګړو پروګرامونو له لارې د تحقيق ارزښت او په تدريس کې عملي کول.

4)   د څانګې په کچه د علمي پرسونل هڅول،  چې د دغو روزنيزو پروګرامونو محتويات په خپلو تحقيقاتي پروژو کې تطبيق کړي.

5)   روزل شوي استادان به مکلف وي چې محصلانو ته وروښيي چي په څه ډول خپلې صنفي پروژې، سيمينارونه، ګروپي کنفرانسونه او نورې زده کړييزې پروسې د نويو څيړنيزو ميتودونو په مرسته ترسره کړي.

6)   د شاګرد محورۍ له ميتود څخه لکه فعالې زده کړې، همکارې زده کړې، د پروژو او ستونزو پربنياد زده کړې په ټولګيو کې کارول

7)   د OBE/SCL ميتود عملي کول

8)   د مختلفې معاصرې ټيکنالوژۍ څخه استفاده کول

9)    د ټولنې پر اساسي ستونزو څيړنې کول او هغوي ته د حل‌لارو موندل.

10)  د مهندسي څانګه هڅه کوي چې په استادانو کې د نوښت او ابتکار روحيه پياوړې کړي. ياده اداره ژمنه ده، چې نوښتګر استادان او محصلين وستايي چې دا بهير لا ګړندي کړي.

11)  محصلانو ته د عملي کار (Internship) زمينه برابرول

12)  محصلانو ته د علمي ساير زمينه برابرول

13)  د استادانو او محصلانو له لورې علمي او روزنيزو پرزينټشنونو ورکول او ورکشاپونو دايرول

14)  د محصلانو ترمنځ د لا همانګۍ په پار د علمي برنامو لکه: کلتوري برنامې، مباحثې، محاوري ساعتونه او نور پر لاره اچول

15)  په ټولنه کې د استادانو او محصلانو رغنده رول لوبول

16)  د مهندسي څانګې رهبري او اداره هڅه کوي د موثقو او کره مالوماتو په راټولولو او تحليل سره وکولی شي، د زده کوونکو بريا او اغيزمنتوب ته وده ورکړي.

  د مهندسي څانګې کاریکولم

  د مهندسي څانګې استادان

د مهندسي څانګې د استادانو شمير د رتبو په تفکيک سره