شیخ زاید پوهنتون کې د جلالتمآب ولسمشر پر لیکل شوي کتاب ،، سولې لار نقشه،، باندې سیمینارونه وړاندې شول
نن چهارشنیې (۱۲/جوزا/۱۴۰۰) د شیخ زاید پوهنتون غونډو په تالار کې د جلالتمآب ولسمشر دوکتور محمد اشرف غني پر کتاب چې د سولې په اړه هر اړخیز معلومات لري، سیمینارونه وړاندې شول.
په غونډه کې د شیخ زاید پوهنتون رئیس پوهنمل حسین ګل اریوبي ترڅنګ د پوهنتون مرستیالانو، استادانو او محصلانو ګډون کړی و. د غونډې په پرانیستونکې وینا کې محترم اریوبي په کتاب کې د لیکل شوې طرحې او وړاندیزونو په تړاو هر اخیزې خبرې وکړې او ویې ویل، چې د خارجیانو وتل افغانستان ته یو تهدید نه بلکې خپلمنځي روغې ته یو غوره فرصت دی، چې بشري او مادي پرمختیا لپاره تر بل هر څه اړین دی.
ورپسې د ژبو او ادبیاتو پوهنځي استاد عبدالصمد روښان او د ټولنیزو علومو پوهنځي استاد محمد عالم ساپي لخوا پر کتاب ( سولې لارنقشه) باندې هراړخیز سیمینارونه وړاندې شول. په سیمینارونو کې دواړو استادانو کتاب ښه شربلای و، چې په نتیجه کې یې د عادلانه او پُروقاره سولې لپاره یو شمېر وړاندیزونه وړاندي کړل.
د علمي چارو مرستیال پوهندوی استاد شفیع ګل شفیقي لخوا سیمینارونه مثبت وارزول شول او استادانو ته یې د مننې ترڅنګ وویل، چې د دوی پشنهادات به د لوړو زده کړو وزارت سره شریک کړل شي.
د یادونې وړ ده، چې شیخ زاید پوهنتون رهبرۍ په اړینو حالاتو کې هروخت د موضوعاتو اړوند علمي سیمینارونه او ورکشاپونه دایر کړي، ترڅو مسایلو ته د حل مناسبې لارې پیدا شي.
