په (SPSS) کې د کمي او کیفي ډاټا تحلیل تر نوم لاندې ورکشاپ پيل شو.
نن سه شنبه د ۱۴۰۳ هـ.ش کال د ثور مياشتې ۲۵مه، چې د ۱۴۴۵ هـ.ق کال د ذالقعدې مياشتې پنځمې نيټې سره سمون لري، شيخ زايد پوهنتون کې د ټولنيزو علومو احصائیوي بستې (SPSS) په واسطه د معلوماتو کمي او کیفي تحليل درې ورځنی ورکشاپ پیل شو.
د ياد ورکشاپ د پیل په مراسمو کې د شيخ زايد پوهنتون رئیس شيخ الحدیث مسلمين راشد په خپلو خبرو کې دا ډول ورکشاپونه د څېړنو په برخه کې ډېر ګټور و بلل او زياته یې کړه، چې زمونږ او ستاسې هر ډول تحقیقات باید د الله جل جلاله رضاء حاصلولو او انسانيت ته خير رسولو په نيت وي، نوموړي د دا ډول ورکشاپونو د لا زياتيدو هيله څرګنده کړه.
یاد ورکشاپ د شيخ زايد پوهنتون علمي څېړنو معاونيت په هڅو برابر شوی دی، چې د بېلا بېلو پوهنځیو (۴۰) څلويښت علمي کادرونه پکې ګډون لري او درې ورځې به دوام وکړي.
