شیخ زاید پوهنتون کې د خوست والي مولوي محمد نبي عـ.مري لپاره مننغونډه
شیخ زاید پوهنتون کې د خوست ولایت والي مولوي محمد نبي عـ.مري څخه د خوست ولایت بېلا بېلو بنسټونو په ځانګړي ډول له شیخ زاید پوهنتون سره د هغه د زياتو همکاریو په پار د مننې غونډه تر سره شوه.
په یاده غونډه کې د خوست ولایت والي ښاغلي مولوي محمد نبي عم.ري، د شیخ زاید پوهنتون رئیس انجینر همایون معاویه، د شیخ زاید پوهنتون علمي، اداري او محصلانو چارو مرستيالانو، د بېلا بېلو پوهنځیو رئیسانو، د ولایت مقام د عامه اړیکو مسؤل اختر محمد عکرمه، د شیخ زاید پوهنتون استادانو، اداري کارمندانو او د رسنیو مسؤلینو ګډون درلود.
غونډه د قاري واحدالله واحدي په تلاوت پیل او د شیخ زاید پوهنتون د ټولو استادانو په استازیتوب د شرعیاتو پوهنځي رئیس پوهنمل محمد ولید اسحق زي خبرې وکړې، نوموړي د خوست والي ښاغلي عـ.مري څخه د خوست ولایت په بېلا بېلو برخو کې په ځانګړي ډول د شیخ زاید پوهنتون سره د بې شمېره همکاریو مننه وکړه، نوموړي ته یې په راتلونکو ورسپارل شویو مسؤلیتونو کې د بریالیتوب غوښتنه وکړه.
ورپسې د خوست والي مولوي محمد نبي عـ.مري خبرې وکړې او ویې ویل، چې په تېرو شلو کلونو کې د هېواد بېلا بېلو برخو زيات زيان موندلی دی، چې رغول یې وخت او حوصلې ته اړتیا لري، مونږ شپه او ورځ د دې ملک د ابادۍ او سوکالۍ لپاره کار کوو او د الله ج څخه مو غوښتنه دا ده، چې دا هېواد په خپلو پښو ودرېږي، نوموړي زياته کړه، چې دا خاوره د مسلمانانو ده او تل به اسـ.لامي نظام پکې چلیږي، د پوهنتون هر محصل باید په خپله برخه کې دې خاورې ته کار وکړي، په هغو کارونو کې چې دوی پوهه لري، مونږ ته دې مشورې راکړي او د هر ډول عقیدوي تفرقي څخه دې په ټولنه کې مخنیوی وکړي.
په پای کې ښاغلي عـ.مري او د شیخ زاید پوهنتون رئیس معاويه ته د مننې په پار د پښتني دود له مخې د برم او عزت چپنې او پکړۍ ور په سر کړل شوې، همدارنګه هغه ستاینليک چې د شيخ زايد پوهنتون استادانو لخوا برابر شوی و، د شيخ زايد پوهنتون رئیس او استادانو په لاس ښاغلي عـ.مري ته ورکړل شو.
غونډه د پوهنتون د اداري چارو مرستيال مولوي محمد شفیق رشاد لخوا د عایې په ویلو پای ته ورسيده.
د نشراتو، اطلاعاتو او عامه اړیکو آمریت
