شیخ زاید پوهنتون اداره د ناورینونو او بحرانونو پرمهال تل د ولسونو ترڅنګ پاتې شوې ده
د زلزلي د بدمرغه ناورین رامنځته کېدو سره سم د شیخ زاید پوهنتون ادارې کاري سټاپ زلزله ځپلو سیمو سره همکارۍ ته ځانګړی کړی دی، د پېښې رامنځته کېدو سره سم د ياد پوهنتون رهبرۍ، ادارې او په ځانګړي ډول دشیخ زاید پوهنتون تدریسي روغتون مواظف ډاکتران او شته امکانات یې د پیښې ځای ته رسیدلې دي، چې د ناورين په لومړيو کې د شپې تر یوې بجې پورې عملاُ د زلزله ځپلو سره په طبي همکاریو بوخت وو.
نن ورځ شیخ زاید پوهنتون ادارې د نغدي مرستو په لړکې (د شیخ زاید پوهنتون مخلصو او په وطن مینؤ محصلینو د زلزله ځپلو هېوادوالو سره غم شریکې او مرسته) ترسلیک لاندې پیل کړه، چې د شیخ زاید پوهنتون ادارې ترڅنګ د محصلینو فعاله ونډه اخېستنه ددې ثبوت وړاندې کوي، چې د افغانانو درد یو دی او ډېر په اخلاص سره به خپلې مرستې کوي.
واقعًا ستاسې یوه افغانۍ مرسته په دغه غمجن وخت کې حياتي ارزښت لري؛ ځکه چې په يادو زلزله ځپلو سیمو کې بشري ناورین دی او خلک یې ستاسې مرستو ته اړتیا لري.
