شیخ زايد پوهنتون کې د طبیعي علومو ملي سمپوزیم د ارزونې او پای مراسم تر سره شول.
نن پنجشنبه د ۱۴۰۲ هـ.ش کال د چنګاښ مياشتې ۲۲مه نيټه، شیخ زاید پوهنتون کې د طبیعي علومو ملي سمپوزیم د پای مراسم د قاري محمد جواد لخوا د قرآن کريم څو مبارکو آیتونو په تلاوت سره پیل شول. مراسمو ته د شیخ زاید پوهنتون رئیس شیخ محمد یعقوب نيازي په خپله وینا کې خوښي څرګنده کړه چې یاد سمپوزیم یې په بريالیتوب سره پای ته ورساوه، نوموړي د لوړو زده کړو وزارت د رهبري، بېلا بېلو پوهنتونونو رئیسانو، استادانو، مېلمنو څخه زياته مننه وکړه چې په دې ملي سمپوزیم کې تر پايه پاتې شول او زياته یې کړه چې د دوی قدر او عزت یې په هغه ډول چې لازم و، شاید نه وي تر سره کړی. همدارنګه د شیخ زاید پوهنتون له استادانو په ځانګړي ډول له هغه استادانو او اداري کارکونکو څخه چې د ياد ملي سمپوزیم په ترتیب کې یې مهمه برخه لرله مننه وکړه.
د لوړو زده کړو وزارت علمي معین ښاغلي دوکتور لطف الله خيرخواه ياد ملي سمپوزیم مثبت وارزاوه او د افغانستان د ټولو پوهنتونونو رئیسانو او استادانو څخه چې په یاد سمپوزیم کې یې ګډون کړی و او مقالې یې وړاندې کړې مننه وکړه، همدارنګه د شیخ زاید پوهنتون له مشرتابه او استادانو څخه چې د دغه ملي سمپوزیم چارې یې په ښه ډول تنظیم کړې وې مننه وکړه. نوموړي په راتلونکي کې دا ډول سمپوزیمونو او کنفرانسونو د لا زياتېدو او ځینو نمګړتیاوو د اصلاح یو شمېر سپارښتنې هم وکړې.
د ننګرهار پوهنتون د علمي چارو مرستيال پوهندوی احسان الله ناصح او د بدخشان پوهنتون رئیس ښاغلي نقیب الدین قاضي زاده د لوړو زده کړو وزارت له رهبري او د شیخ زاید پوهنتون له رهبري مننه وکړه، چې په بریالیتوب یې یاد سمپوزیم پای ته ورساوه.
د ناستې په پای کې هغه ايوارډونه او تایید لیکونه چې د لوړو زده کړو وزارت او شیخ زاید پوهنتون ادارې له خوا برابر شوي و، په مشخصو ګډونوالو ووېشل شول او مراسم د دعاء په ویلو پای ته ورسیدل.
نشراتو، اطلاعاتو او عامه اړیکو آمریت
