شيخ زاید پوهنتون ته نوی رئیس معرفي شو
هغه ناسته چې په همدې موخه نن ورځ د ۱۴۰۱ ل.ل کال د لیندۍ میاشتې ۲۳مه، چې د ۱۴۴۴ هـ.ق کال د جمادي الاول مياشتې له ۲۰مې نیټې سره سمون لري، شیخ زاید پوهنتون کې رابلل شوې وه، یاده غونډه کې د خوست ولایت مرستیال والي مولوي محمد انور دین پرور، د شیخ زاید پوهنتون پخوانی رئیس انجینر همایون معاویه، د شیخ زايد پوهنتون اوسنی رئیس شیخ الحدیث مولوي محمد یعقوب حـ.قاني، د شیخ زاید پوهنتون د بېلا بېلو پوهنځیو رئیسانو، استادانو، اداري کارکوونکو او مېلمنو ګډون کړی و.
غونډه د شیخ زاید پوهنتون اداري چارو مرستیال ښاغلي مولوي محمد شفیق رشاد لخوا د قرآن کريم څو مبارکو آیتونو په تلاوت سره پیل شوه، ورپسې د طب پوهنځي استاد پوهاند بادشاه زار عبدالي راغلو مېلمنو ته د ښه راغلاست تر څنګ د انجینر همایون معاویه کړنې وستایلې او زياته یې کړه، چې تېر څه باندې یو کال کې یې د پوهنتون کارونه ډېر په دوستانه او د صمیمت په فضا کې په مخ یوړل. ښاغلي عبدالي د نوي رئیس څخه د پوهنتون د روانو پروژو د تکميل او د نویو پروژو د رامنځته کولو هیله وکړه او زياته یې کړه چې د پوهنتون ټوله اداره به ورسره په ټولو کارونو کې همکاره او همغږي وي.
د خوست ولایت مرستیال والي مولوي محمد انور دین پرور د شیخ زاید پوهنتون پخواني رئیس خدمات او کارونه د قدر وړ وبلل او زياته یې کړه چې په ادارو کې ادلون او بدلون یو اداري اصل دی، چې د یوې ادارې د کارونو په ښه شان تر سره کېدو په موخه ترسره کیږي. نوموړي وويل چې استاد د معنوي پلار حیثیت لري باید استادان د خپلو محصلانو سره د خپلو اولادونو په شان چلند وکړئ، همدارنګه نوموړي سپارښتنه وکړه چې استادان باید په پوهنتون کې د هيڅ ډول سیاسي او ګوندي فعالیتونه تر سره نه کړي.
د شیخ زاید پوهنتون نوي رئیس شیخ الحدیث مولوي محمد یعقوب حـ.قاني په خپلو خبرو کې وویل: (( پوهنتون د علم ځای دی او علم د الله جل جلاله یو ذاتي صفت دی، مونږ او تاسې ټول باید د علم دغه لوی کور ته په شریکه خدمت وکړو.))
ښاغلي حـ.قاني وويل چې په ادارو کې د ادلون او بدلون اصل ته په کتو د اس ـ ام لخوا د علم د دغه لوی کور مسؤلیت راسپارل شوی دی، چې زه به دلته د رئيس په صفت نه؛ بلکې د یو خادم او خدمتګار په حيث ستاسو په همکارۍ دغه دنده پرمخ وړم.
غونډه په خوست ولایت کې د امر بالمعروف او نهي عن المنکر ریاست محتسب مولوي فضل الرحیم مسرور لخوا د دعا په ويلو سره پای ته ورسیده.
د نشراتو، اطلاعاتو او عامه اړیکو آمریت
