د پوهنتون استادانو او کارکوونکو معلوماتو د ثبت لپاره مدیریتي سیستم جوړ شو.
د شيخ زايد پوهنتون استادانو او کارکوونکو د بیوګرافیکي معلوماتو د ثبت لپاره (د سوانحو او ارزونې د معلوماتو مدیریتي سیستم) په نوم ډاېټابېس جوړ او ګټې اخیستنې ته وسپارل شو.
په دغه معلوماتي سیستم کې به د استادانو او کارکوونکو اړوند ټول معلومات او د دوی اړوند ارزونې په اسانۍ سره خوندي او په کم وخت کې د لاسرسي وړ وي.
د سوانحو او ارزونې معلوماتي مدیریتي سیستم يادې پروژې ته د کمپيوټر ساینس پوهنځي د څلورم ټولګي محصلانو هر یو محمد غني حسیني، زاهد الله سعادت، عبدالبصوير ذهين، دوست محمد ځدراڼ، انور نوري او نور جهان عزیزي د ګډ کار او هڅو په نتيجه کې پرمختګ ورکړل شوی دی، چې د پوهنتون د کارکوونکو چارو آمريت ته د ګټې اخیستنې په موخه وسپارل شوه.
دا په داسې حال کې ده، چې تر دې وړاندې هم د شيخ زايد پوهنتون کمپیوټر ساينس پوهنځي محصلانو لخوا د خپلو څېړنيزو پروژو په ترڅ کې دې ته ورته معلوماتي سیستمومونه د بېلا بېلو ادارو د غوښتنو په اساس د کارونو د ښه پر مخ بېولو لپاره را منځته شوي دي، چې د چارو د ښه تنظیم په برخه کې مؤثر تمام شوي دي.
نشراتو او عامه اړیکو آمريت
