د نصاب اړوند موضوعاتو د ښه تطبیق تر عنوان لاندې یو ورځنی ورکشاپ داير شو.
سه شنبه د ۱۴۰۳ هـ.ش کال د عقرب میاشتې ۸مه، چې د ۱۴۴۶ هـ.ق کال د ربیع الثاني مياشتې ۲۶مې نېټې سره سمون لري، د شيخ زايد پوهنتون بېلا بېلو پوهنځيو کې تازه ګمارل شویو استادانو لپاره (د نصاب اړوند موضوعاتو د ښه تطبیق) تر عنوان لاندې د ظرفيت لوړونې یو ورځنی ورکشاپ داير شو.
د ورکشاپ ګډونوالو ته د شيخ زايد پوهنتون علمي مرستيال پوهنیار نور الله حسین خېل په خپلو خبرو کې وويل؛ چې په تحصیلي مرکزونو کې نصاب د ملا تير حیثيت لري، که نصاب معياري وي او په ښه ډول تطبيق شي؛ نو په هغه صورت کې ټولنې ته په ښه ډول خدمات وړاندې کيدای شي، نوموړي ګډونوالو ته په ورکشاپونو کې په خپل وخت د ګډون سپارښتنه وکړه.
ياد ورکشاپ د شيخ زايد پوهنتون علمي معاونيت تر چتر لاندې د مسلکي پراختیا مرکز لخوا برابر شوی و، چې ۲۵ تنو استادانو پکې ګډون کړی و او د ټولنيزو علومو پوهنځي علمي کادر غړي پوهنوال زرولي صدیقي، د ښوونې او روزنې پوهنځي علمي کادر غړو پوهنوال عبدالتواب عزیزي او پوهندوی خان وزير عادل لخوا وړاندې شو.
نشراتو او عامه اړیکو آمريت
