د شیخ زاید پوهنتون پخوانې رئیس مرحوم استاد دوکتور حضرت میرتوتاخېل فاتحه واخیستل شوه
نن ورځ د ۱۳۹۹ کال د جدي میاشتې په لسمه نیټه د خوست ښار اړوند ازادۍ مېنې مرکزي جومات کې د شیخ زاید پوهنتون ادارې، د مرحوم کورنۍ، قومي مشرانو او د توتاخېلو قومي شورا لخوا د مرحوم دوکتور استاد توتاخېل فاتحه واخیستل شوه.
د فاتحې په مراسمو کې د خوست ولایت والي صیب تورن جنرال مهمند کټوازي او د شیخ زاید پوهنتون رئیس پوهنمل حسین ګل اریوبي ترڅنګ خوست میشتو ولسونو، د پوهنتون استادانو او کارمندانو، د ښار اتحادیې مشرانو او نورو دولتي مامورینو ګډون درلود.
په یادو مراسمو د خوست والي مهمند کټوازي په خپلو خبرو کې د مرحوم دوکتور توتاخېل د خدماتو ستاینه وکړه او زیاته یې کړه ’’که غواړی چې ستاسو نسلونه د استاد دوکتور توتاخېل په شان علمي کادرونه جوړشي، نو سولې ته کار وکړئ، ځکه چې د روانو ناخوالو څخه د وتو یواځینی لاره په علمیت ځان سمبالول دي”.
د شیخ زاید پوهنتون رئیس پوهنمل حسین ګل اریوبي هم د شیخ زاید پوهنتون په تأسیس کې د استاد دوکتور توتاخېل هلې ځلې نه هیریدونکې وبللې او هغه څه چې مرحوم د خپل علمي ژوند په دوران کې افغانې ټولنې ته کړیدي د خلکو په زړونو کې به د تل لپاره یاد ساتل کيږي.
د شیخ زاید پوهنتون د استادانو په استازیتوب پوهنوال محمدالله مندوزي او پوهاند بادشازار عبدالي لخوا د مرحوم دوکتور توتاخیل په ژوند او خاطراتو باندې لنډې خبرې وکړي او یاده یې کړه چې د مرحوم له برکته هېواد کې زیاته اندازه علمي کادرونه شتون لري
