د شیخ زاید پوهنتون او شمل خرم فرعي دریايي حوزوي ریاست ترمنځ د همکاریو هوکړه لیک لاسلیک شو
نن ورځ د ۱۳۹۹ کال د قوس یا لیندۍ میاشتې په (۲۵) نیټه د شیخ زاید پوهنتون او شمل خرم فرعي دریايي حوزوي ریاست ترمنځ په اتو (۸) مادو کې د شیخ زاید پوهنتون رئیس پوهنمل حسین ګل او د شمل خرم فرعي دریایي حوزوي ریاست رئیس محترم زین الله نسیمي لخوا د انجینري مسلک اړوند په علمي چارو او عملي څېړنیزو برخو کې د مرستو هوکړه لیکلاسلیک شو، چې خوشبختانه د سیلابي اوبو د مخنیوي شپږو(۶)چک ډیمونو او ویالو په اساسي ډول د جوړیدو لپاره د سروې چارې یې سر له نن څخه پیل شوې.
د شیخ زاید پوهنتون رئیس حسین ګل اریوبي یاد هوکړه لیک د شیخ زاید پوهنتون لپاره ډېر ګټور وباله او زیاته یې کړه، چې دا ډول تفاهم لیکونه د محصلینو په عملي زده کړو کې ډېر مفید ثابتیږي، چې له امله به یې د انجینري پوهنځي محصلین په عملي کارونو کې ډېره پیاوړتیا تر لاسه کړي.
په یاد هوکړه لیک کې د دواړو اړخونو لخوا د افکارو د تبادلې او د اسانتیاوو په برابرولو، د علمي، تحقیقاتي او تکنالوژیکي نمایشاتو، څېړنیزو کارونو، محصلینو ته د دوی اړوند پروژو کې د روزنې زمینې برابرول، محصلینو ته د روزنې په برخه کې ټولې اسانتیاوې د شمل خرم او دریایي حوزوي ریاست لخوا برابرول، انجینري پوهنخي محصلینو لخوا د اړتیا وړ پروژو په ډیزاین کې همکاري او د دواړو خواوو لخوا به د نویو معلوماتو، کتابونو او تحقیقاتي نتایجو شریکولو په برخه کې همکارۍ ترسره کوي.
د یادولو وړ ده، چې د شیخ زاید پوهنتون رهبري د محصلینو عملي زده کړو د ښې پیاوړتیا په موخه د نورو ریاستونو سره هم ورته هوکړه لیکونه لاسلیک کړيدي
