د روان کال فراغتونو په دوام نن هم د شيخ زايد پوهنتون له دوو پوهنځيو څخه (۱۹۵) تنه محصلان فارغ شول.

نن سه شنبه د ۱۴۰۳ هـ.ش کال د زمري مياشتې ۲۳مه، چې د ۱۴۴۶ هـ.ق کال د صفرالمظفر مياشتې له نهمې نيټې سره برابره ده، د شيخ زايد پوهنتون له دوو پوهنځيو د کرنې له شپږو څانګو څخه (۱۰۱) او د شرعیاتو پوهنځي له دوو څانګو څخه (۹۴) تنه محصلان فارغ شول.

د شرعياتو پوهنځي فراغت غونډې لپاره د جوړو شویو مراسمو پر مهال د شيخ زايد پوهنتون رئیس شيخ الحدیث مسلمين راشد، په خپله وینا کې فارغو شویو محصلانو او د هغوی خپلوانو ته د مبارکۍ تر څنګ په خپل ځان کې د غوره اخلاقو پیدا کول، د الله جل جلاله احکامو او نبوي سيرت ته درناوی، له فراغت وروسته خپلو ورسپارل کېدونکو مسؤلیتونو ته په پوره صداقت سره ژمنتیا په اړه لنډې او ارزښتناکې خبرې وکړې، چې په دې سره به ستاسو مسلک له برکتونو او فضیلتونو څخه ډک شي.

شيخ زاید پوهنتون تېره ورځ هم (۲۴۲) کادرونه ټولنې ته د چوپړ په موخه وړاندې کړل.