د شیخ زاید پوهنتون د دوو پوهنځیو فراغت غونډې ترسره شوې.
د ۱۴۰۴ هـ.ش کال د زمري میاشتې لومړۍ، چې د ۱۴۴۷ هـ.ق کال د محرم الحرام میاشتې له ۲۷مې نیټې سره سمون لري، د شيخ زايد پوهنتون انجنیري پوهنځي سېول څانګې څخه ۷۷ او د حقوقو او سياسي علومو پوهنځي له دوو څانګو څخه ۸۰ محصلان فارغ شول.
هغه غونډې چې نن ورځ په همدې موخه د شيخ زايد پوهنتون امام ابوحنیفه او امام ابویوسف رحمهما اللّٰه تعالیٰ عنهما غونډو تالارونو کې را بلل شوې وې، د شيخ زايد پوهنتون رئيس شيخ الحدیث مولوي محمد نسيم حـ.ـقـ.ـاني، علمي، مالي او اداري چارو مرستيالانو، د دواړو پوهنځيو رئیسانو، استادانو، د فارغو شویو محصلانو خپلوانو او ګڼ شمېر محصلانو ګډون کړی و.
غونډو ته ویناوالو په خپلو ویناوو کې د مبارکیو تر څنګ د انجنیري، حقوقو او سياسي علومو په اهمیت او اړتیا، د مسؤلیت پېژندنه، د علم ارزښت، د خپلو والدینو، استادانو او د نـ.ـظام مسؤلینو شکر اداء کول چې شپاړس کاله یې د زده کړو زمينه درته مساعده کړې وه، تر ماسټرا او دوکتورا تر کچې خپلو زده کړو ته دوام، څېړنو او مطالعې کولو په اړه ویناوې او توصیې وشوې.
د شيخ زايد پوهنتون رئيس شيخ الحدیث محمد نسيم حـ.ـقـاني په خپله وینا کې د حقوقو او سياسي علومو پوهنځي محصلانو ته وويل:((افغانستان په هره برخه کې زيات خدمت او کار ته اړتيا لري؛ تاسو هغه څوک یاست، چې دا تشه به پوره کوئ، چې تاسو ته به ضرور مسؤليت در سپارل کېږي، کوښښ وکړئ چې خپل مسؤلیتونه په پوره امانتدارۍ سره تر سره کړئ.))
غونډې فارغو شویو محصلانو ته د تصدیق پاڼو په ورکولو او د دعاء په ویلو سره پای ته ورسیدې.
نشراتو او عامه اړیکو آمريت
