شیخ زاید پوهنتون کې د کونړ زلزلې ځپلو لپاره د مرستې راټولو لړۍ پیل شوه.
نن سه شنبه د ۱۴۰۴ هـ.ش کال د سنبلې مياشتې ۱۱مه، چې د ۱۴۴۷ هـ.ق کال د ربیع الأول مياشتې له نهمې نيټې سره سمون لري، شیخ زاید پوهنتون کې د کونړ ولایت زلزلې ځپلو لپاره د مرستې راټولو لړۍ پیل شوه.
د شيخ زايد پوهنتون ځانګړي کمېټه به د زلزلې ځپلو هېوادوالو سره د کومک او مرستې په موخه د پوهنتون استادانو، کارکوونکو او محصلانو څخه د دوو ورځو په جریان کې نغدي مرسته راټولوي او په عاجل ډول به یې اړمنو کسانو ته ورسوي.
د شيخ زايد پوهنتون رهبري د خپلو قدرمنو علمي او اداري کارکوونکو او محصلانو د یادې همکارۍ له امله قدرداني کوي او هيله لري چې د دوی صدقې به د الله جل جلاله په دربار کې د دنیا او آخرت د نېکمرغۍ سبب شي.
نشراتو او عامه اړیکو آمريت
