محصلانو ته د جرمي صحنې تمثیل تر سره شو.
د شیخ زاید پوهنتون شرعیاتو، حقوقو او سیاسي علومو پوهنځیو محصلانو ته د عملي زده کړو په موخه د جرمي صحنې تمثیل تر سره شو. دغه تمثیل چې د شیخ زاید پوهنتون رئیس شیخ الحدیث مولوي محمد نسیم حـقـاني، مرستیالانو، د شرعیاتو، حقوقو او سیاسي علومو پوهنځیو رئیسانو، استادانو، د خوست امنیه قومندانۍ د کریمنالتخنیک مسؤلینو او محصلانو په حضور کې، د محصلانو چارو معاونیت لخوا د خوست امنیه قومندانۍ په همکارۍ محصلانو ته د نظري زده کړو ترڅنګ د عملي زده کړو په موخه د امنیه قومندانۍ اړوند کریمنالتخنیک لخوا تر سره شو. په یاد تمثیل کې د جرمي صحنې تشریح، مجـ.ـرم پېژندل، د جرم بررسي کول، د جرم راپور ورکول او دې ورته موضوعات په عملي بڼه وړاندې شول. محصلانو خوښ و، چې د نظري زده کړو تر څنګ ورته عملي زده کړې هم ورکول کېږي، دوی د صحنې وړاندې کولو په جریان کې بېلا بېلې پوښتنې مطرح کړې چې د کریمنالتخنیک مسؤلینو لخوا ورته د قناعت وړ ځوابونه ورکړل شول. په وروستیو کې د محصلانو چارو مرستیال پوهنیار مجاهد همت یار له ټولو ګډونوالو او په خاص ډول د خوست امنیه قومندانۍ کریمنالتخنیک مسؤلینو څخه مننه وکړه، چې محصلانو ته یې د عملي زده کړو په موخه د جرمي صحنې تمثیل په ښه شان تر سره کړ. په پای کې د شیخ زاید پوهنتون ادارې لخوا د امنیه قومندانۍ کریمنالتخنیک مسؤلین په ستاینلیکونو تقدیر شول. نشراتو او عامه اړیکو آمریت
