د شیخ زاید پوهنتون رئیس شیخ صاحب محمد یعقوب نیازي د پوهنتون اداري کارکوونکو سره د پېژندنې او همغږۍ ناسته تر سره کړه.
د شيخ زاید پوهنتون رئیس ښاغلي شیخ صاحب محمد یعقوب نيازي د یوې ناستې په ترڅ کې د پوهنتون اداري کارکوونکو سره د پېژندنې او همغږۍ ناسته تر سره کړه.
یاده ناسته کې د شیخ زاید پوهنتون رئیس سربېره د پوهنتون معاونینو، د بېلا بېلو برخو آمرينو، تدریسي او اداري عمومي مدیرانو او مامورینو ګډون درلود.
ناسته د کلام الله د څو سپېڅلو آیتونو په تلاوت سره پیل شوه.
لومړۍ د بېلا بېلو برخو مامورينو خپل ځانونه معرفي کړل، ورپسې د شیخ زاید پوهنتون رئیس ښاغلي نيازي عالمانه او هر اړخيزې خبرې وکړې او ویې ويل؛ چې تل انقلابونه د یو ملک حکومتونو ته تغير ورکوي، خو خلک هماغه خلک وي، ملک ته په شریکه د یو ګډ هدف په لوري حرکت ورکوي، دا هغه وخت امکان لري چې ټول یو بل سره د همکارۍ او اخلاص له مخې کار وکړو. نوموړي وویل؛ چې ستاسو هره معقوله غوښتنه او پېشنهاد چې د پوهنتون د پرمختګ او آبادۍ لپاره مهم وي، په ورين تندي به ومنل شي.
ښاغلي نيازي د مامورینو څخه صمیمانه هيله وکړه، چې د لوړو زده کړو وزارت د اصولو او مقرراتو مطابق خپل مسؤلیتونه په ښه شان سره پرمخ یوسئ او د هر ډول سستۍ او غفلت څخه په کلکه ځانونه وساتئ، تر څو د علم دغه ستر کور چارې د ځنډ او خنډ سره مخامخ نشي.
نشراتو، اطلاعاتو او عامه اړیکو آمريت
