محصلانو ته د مونوګراف او مقاله لیکنې تر سر لیک لاندې یو ورځنی سیمینار تر سره شو.
نن شنبه د ۱۴۰۴ هـ.ش کال د ثور ۶مه، چې د ۱۴۴۶ هـ.ق کال د شوال المکرم میاشتې له ۲۷مې نیټې سره سمون لري، د شیخ زاید پوهنتون اقتصاد، کرنې، حقوقو او سیاسي علومو، ژورنالېزم او عامه اړیکو پوهنځیو څلورم ټولګي محصلانو ته د علمي اثارو، مقاله او مونوګراف لیکنې تر نوم لاندې یو ورځنی سیمینار ورکړل شو.
د سیمینار د پرانیستې په مراسمو کې د محصلانو چارو مرستیال پوهنیار مجاهد همت یار په خپلو خبرو کې وویل؛ چې روان کال به د نورو کالونو څخه په زیاته اندازه د محصلانو ظرفیت لوړونې په برخه کې مختلف سیمینارونه وړاندې کړي، تر څو د محصلانو ستونزو ته پر وخت سره رسیدنه شوي وي.
یاد سیمینار د علمي څېړنو او محصلانو چارو معاونیتونو په همغږۍ سره ترتیب شوی و، چې پکې د څېړنو پېژندنه، د څېړنو اهمیت، د عملي څېړنو ځانګړتیاوو، د څېړنو پروسه او د څېړنو جوړښت موضوعاتو باندې معلومات وړاندې شول، چې د علمي څېړنو مرستیال پوهندوی دوکتور احمد جاوید شکیب لخوا وړاندې شو.
د یادونې وړ ده چې دغه ډول سیمینارونه د شیخ زاید پوهنتون نورو پوهنځیو محصلانو هم وړاندې کېږي، تر څو په یاده برخه کې د محصلانو ستونزې حل شي.
نشراتو او عامه اړیکو آمریت
