د کیفیت لوړونې او اعتبار ورکؤنې هیئت پلاوي شیخ زاید پوهنتون مسؤلینو سره لومړنۍ ناسته ترسره کړه.

نن ورځ د ۱۴۰۱ هـ.ش کال د دلوې میاشتې ۸مه نیټه، چې د ۱۴۴۴ هـ.ق کال د رجب المرجب میاشتې له ۶ نیټې سره برابره ده، د لوړو زده کړو وزارت د کیفیت لوړونې او اعتبار ورکؤنې هیئت لخوا د شیخ زاید پوهنتون پي ډي سي دفتر کې د اعتبار ساتنې د بررسۍ په پار غونډه ترسره کړه.
په یاده غونډه کې د شیخ زاید پوهنتون رئیس شیخ محمد یعقوب نیازي، د لوړو زده کړو وزارت د کیفیت لوړونې او اعتبار ورکؤنې راغلي پلاوي، د پوهنتون علمي چارو مرستیال، مالي او اداري او محصلانو چارو مرستیالانو او د پوهنځیو رئیسانو ګډون درلود.

غونډه د قرآنکریم د څو مبارکو ایتونو په تلاوت سره د مالي او اداري چارو مرستیال مولوي محمد شفیق رشاد لخوا پیل شوه.
د شیخ زاید پوهنتون رئیس شیخ محمد یعقوب نیازي راغلي هیئت ته د ښه راغلاست ویلو ترڅنګ وویل، چې ستاسو راتګ شیخ زاید پوهنتون ته یو افتخار ګڼو او هم ستاسو خدمات د پوهنتونونو په برخه کې یو عبادت بولو.

ښاغلي نیازي زیاته کړه چې پوهنتونونه د علم مرکزونه دي او د علم په ډګر کې باید په ګډه سره په پوره همکارۍ هلې ځلې وکړو ترڅو هېواد مو په دې برخه کې له نورو سره سیال پاتې شي.
د شیخ زاید پوهنتون علمي چارو مرستیال پوهنمل عبدالطیف رحیمي د پوهنتون په اړه یو لنډ پریزینټیشن وړاندې کړ او د پوهنتون په اړه یې له یاد هیئت سره معلومات شریک کړل.
د راغلي هیئت په مشرۍ ښاغلي پوهاند دوکتور محمد ظریف شریفي وویل چې خوشبختانه چې شیخ زاید پوهنتون په دې برخه کې پوره تیاری نیولی دی، خو بیا هم یاد هیئت به د کار پروسه د مهال وېش سره سم پرمخ وړي.
غونډه د دعا په ویلو سره پای ته ورسیده.
د نشراتو، اطلاعاتو او عامه اړیکو آمریت