د کمال خان بند د خوښیو نمانځلو په پار د والیبال سیالۍ پای ته ورسیدې
ېپرون ورځ دوشنبې (۹/حمل/۱۴۰۰) شیخ زاید پوهنتون کې د ۱۲ پوهنځیو ترمنځ د والیبال سیالۍ ، چې د کمال خان بند د خوښیو نمانځلو په پار د محصلانو چارو معاونیت لخوا په لاره اچول شوي وې ، پای ته ورسیدې.
یادو سیالیو پای لوبې ته د کرنې او ادبیاتو پوهنځیو ټیمونو لاره پیدا کړې وه، چې لوبه د کرنې پوهنځي په ګټه پای ته ورسیده.
د پای لوبې ګټونکی ټیم ته د محصلانو چارو مرستیال محمد داود بابکرخیل په لاس د بریا جام ډالۍ شو. ښاغلي بابکرخيل د لوبې ګډونوالو ته په خپلو خبرو کې د کمال خان بند خوشالۍ د ټول هیواد لپاره خوشالۍ وبللې او له ټولو ټیمونو څخه یې مننه وکړه چې د لوبو جریان یې پرته د کومو ستونزو پای ته ورسوو.
ورپسې د مالي او اداري چارو مرستیال فیض الله فیض د محصلانو ترمنځ همغږي وستایله او د دا ډول لوبو او پروګرامونو لپاره یې د حمایت ډاډ څرګند کړ.
د کرنې پوهنځي د والیبال ټیم کپتان محمد یوسف رحماني د ټورنمنټ غوره لوبغاړي په توګه مډال خپل کړ.
د یادولو وړ ده چې د شیخ زاید پوهنتون ادارې لخوا د کمال خان بند په تړاو د لوبو تر څنګ علمي بحثونه، سیمیارونه او مقالې وړاندې شوي دي.
