د لوړو زده کړو وزارت نشراتي مسؤلينو لخوا د پوهنتونو او دیني جامعاتو له آمرينو او مديرانو سره پر لیکه کنفرانس تر سره شو.
تېره ورځ شنبه د ۱۴۰۳هـ.ش کال سلواغې میاشتې شپږمه، چې د ۱۴۴۶هـ.ق کال د رجب المرجب مياشتې له ۲۴مې نیټې سره یې سمون درلود، د لوړو زده کړو وزارت لخوا د هېواد پوهنتونونو او لوړو زده کړو مؤسسو له نشراتي مسؤلینو سره د همغږۍ کنفرانس تر سره شو.
په یاد کنفرانس کې د لوړو زده کړو وزارت مالي او اداري معین مولوي حافظ محمد حامد حسیب، د نشراتو، اطلاعاتو او عامه اړیکو رئیس انجینر حافظ روح الله روحاني، د لوړو زده کړو وزارت ویاند حافظ ضياءلله هاشمي، د نشراتو، اطلاعاتو او عامه اړیکو ریاست آمرینو، د هېواد پوهنتونونو او لوړو زده کړو مؤسسو نشراتي مسؤلینو ګډون کړی و.
د قرآن الکريم څو مبارکو آيتونو له تلاوت وروسته د لوړو زده کړو وزارت مالي او اداري معین مولوي حافظ محمد حامد حسیب په خپلو خبرو کې د وخت ارزښت، د پوهنتون له کړنو او بهیر څخه د خلکو خبرول د نشراتو مهم اصل یاد کړ، نوموړي زياته کړه چې راپورونه مو باید دقیق او د وزارت نشراتو مسؤلینو سره په همغږۍ وي.
د لوړو زده کړو وزارت نشراتو اطلاعاتو او عامه اړیکو رئیس حافظ انجینر روح الله روحاني، د لوړو زده کړو وزارت ویاند حافظ ضیاء الله هاشمي، د نشراتو، اطلاعاتو او عامه اړیکو ریاست د نشراتو آمر صبغت الله سجاد او عامه اړیکو آمر مولوي عبدالحنان عزیزي خبرې وکړې، دوی ټولو د راپورونو په دقت، په خپل وخت نشرولو، راپورونو کې د نظام قوانینو او اصولو ته پاملرنه کول، په راپورونو کې د ولس اعتماد ساتل، د بې ځایه نشراتو څخه ډډه او یو شمېر نور هدایات د پوهنتونونو له نشراتي مسؤلینو سره شریک کړل او له مسؤلینو څخه یې په خپلو نشراتو کې د عملي کولو غوښتنه وکړه او په پای کې د پوهنتونونو نشراتي مسؤلینو لخوا یو شمېر پوښتنې تر سره شوې او معقول ځوابونه ورته وویل شول.
یاده دې وي چې د لوړو زده کړو وزارت په پلان کې لري چې دا ډول پر لیکه کنفرانسونه به د نشراتو مسؤلینو سره هره مياشت تر سره کېږي.
نشراتو او عامه اړیکو آمریت
