د شیخ زاید پوهنتون یو شمېر اړین موضوعات د لوړو زده کړو محترم وزیر سره مخامخ شریک شول
پرون شنبې ورځ ( ۲۳/کب/۱۳۹۹) د شیخ زاید پوهنتون رئیس پوهنمل حسین ګل اریوبي چې د خوست والي تورن جنرال مهمند کټوازی او په ولسي جرګه کې د خوست ولس استازی محترم غفارخان هم ورسره وو، د لوړو زده کړو محترم وزیر دوکتور عباس بصیر سره د پوهنتون یو شمېر اړینو موضوعاتو باندې بحث وکړ.
د ناستې په جریان کې د پوهنتون رئیس ښاغلي اریوبي پوهنتون ته د دوامداره برق، احاطې دیوال د شروع کیدو چارو کې چټکتیا ، مجهزه اشپزخانه او طعام خورۍ، د پوهنتون لینډسکېپ اخیستل، جمنازیم، د نجونې لپاره د لیلیې نوې څلور پوړیزه ودانۍ، د کادري روغتون لپاره د نوې منظورې شوې ودانۍ په چارو کې چټکتیا او په پوهنتون کې د ماسترۍ پروګرام په پیلیدو باندې خبرې وکړې.
ښاغلي اریوبي د لوړو زده کړو محترم وزیر عباس بصیر څخه پوهنتون ته دوامداره برق ، د احاطې دیوال او د کادري روغتون لپاره د نوې منظورې شوې ودانۍ په چارو کې د چټکتیا لپاره د ځانګړې توجه غوښتنه وکړه. ښاغلي اریوبي محترم وزیر صیب ته وریاده کړه چې ((د برق لپاره پشنهاد د لوړو زده کړو پراختیایي پروګرام ( HDEP) دفتر کې موجود دی، کچیرې یې د تعقیب او چټکتیا لپاره د Steering Committee کمیټه راوبلل شي غوره به وي ځکه چې تاسو ددې کمیټې په رأس کې یاست)).
ورپسې محترم غفارخان له وزیر صیب څخه د مننې تر څنګ په ډاکه کړه چې د علمي مراکزو په پیاوړتیا او محصل ته د سهولت په رامنځته کولو کې باید ګړندي ګامونه پورته شي او چې هرځای ستونزه راولاړیږي ټول یې باید په ګډه پر هوارولو کار وکړ.
د خوست والي ښاغلي کټوازي د شیخ زاید پوهنتون پر سیمه یز اهمیت او ارزښت محترم وزیر صیب ته لنډ مالومات ورکړل او غوښتنه یې وکړه چې د پوهنتون هراړخیز انکشاف ته توجه وشي
