د شيخ زايد پوهنتون نشراتو او عامه اړیکو آمریت د ۱۴۰۲ هـ.ش کال کړنې او لاسته راوړنې د یو مطبوعاتي کنفرانس په ترڅ کې له رسنيو سره شريکې کړې.
د یادې خبري ناستې په ترڅ کې د پوهنتون ادارې لخوا د اعتبار ساتلو تر څنګ تېر یو کال د پام وړ لاسته راوړنې؛ لکه د طبيعي علومو ملي سمپوزيم چې د ټول هېواد په کچه رابلل شوی و، ۸۵ څېړنيزې مقالې پکې وړاندې شوې، د څېړنو د لا پراختيا په موخه د علمي څېړنو معاونيت رامنځته کیدل، چې تر دې دمه یې د څېړنو په برخه کې د پام وړ لاسته راوړنې لرلي دي.
د دوکتورا او ماسترا برنامو لپاره د ۳۹ استادانو خارج او داخل ته لیږل، د شرعیاتو او کمپيوټر ساينس شپنيو برنامو رامنځته کول، د کادري او اداري پرسونل لپاره د ظرفيت لوړونې مختلف پروګرامونه پلي کول، ټولنې ته د مختلفو مسلکونو په برخه کې د ۱۴۹۶ محصلانو وړاندې کول، مختلفو ادارو ته د عملي زده کړو په موخه ګڼ شمېر محصلان معرفي کول، د محصلانو ظرفيت لوړونې لپاره مختلف پروګرامونه په لاره اچول، د پوهنتون کادري، اداري کارکونکو او محصلانو د اصلاح او سمون په موخه مختلفې دیني اصلاحي برنامې پلي کول او د شيخ زايد پوهنتون تدريسي روغتون د تېر یو کال چوپړتياوو دقيق ارقام له رسنيو سره شريک شول.
هېره دې نه وي چې شيخ زايد پوهنتون راتلونکي کال کې د حقوقو او سیاسي علومو، ادبياتو او شرعياتو په برخه کې د ماسترا برنامې په پلان کې لري، چې کارونه یې په تېر کال کې نهایي شول.
نشراتو او عامه اړيکو آمريت
