د شيخ زايد پوهنتون له دوو پوهنځيو څخه (۲۴۲) تنه محصلان فارغ شول.
نن دوشنبه د ۱۴۰۳ هـ.ش کال د زمري مياشتې ۲۲مه، چې د ۱۴۴۶ هـ.ق کال د صفرالمظفر مياشتې له اتمې نيټې سره سمون لري، د شيخ زايد پوهنتون له دوو پوهنځيو ښوونې او روزنې له څلورو څانګو څخه (۱۵۰) او د وترنري علومو پوهنځي څخه (۹۲) تنه محصلان فارغ او ټولنې ته د خدمت کولو په موخه وړاندې شول.
د وترنري علومو پوهنځي فراغت غونډې ته د شيخ زايد پوهنتون رئيس شيخ الحدیث مسلمين راشد په خپله وینا کې فارغو شویو محصلانو او د هغوی خپلوانو ته د مبارکۍ تر څنګ وويل:((که چیرې غواړئ د ټولنې کامل انسان له ځان څخه جوړ کړئ؛ نو تقوا او د رسول الله صل الله علیه وسلم سيرت په خپلو ځانونو کې پیدا او د الله جل جلاله احکامو ته غاړه کيږدئ، د مور او پلار قدر کوئ او په ټولنه کې د غوره اخلاقو څخه کار واخلئ، چې په دې سره به تاسو په دغه مسلک کې د لا زياتو برکتونو څخه برخمن شئ.))
د يادولو وړ ده چې شيخ زاید پوهنتون هر کال په مختلفو مسلکونو کې سلګونه کادرونه ټولنې ته د چوپړ په موخه وړاندې کوي، چې د ټولنې په پرمختګ او اصلاح کې یې رغنده رول لوبولی دی.
