د شيخ زايد پوهنتون څېړنو او علمي مجلې معاونيت ته نوی مرستيال معرفي شو.
نن ورځ سه شنبه د ۱۴۰۲ هـ.ش کال د عقرب مياشتې ۳۰مه، چې د ۱۴۴۵ هـ.ق د جمادي الاول مياشتې له ۷مې نيټې سره سمون لري، د شیخ زاید پوهنتون څېړنو او علمي مجلې معاونيت ته دوکتور پوهنمل احمد جاويد شکيب د نوي مرستيال په حیث ور وپېژندل شو.
دوکتور احمد جاويد شکيب د پوهنتون یو له لوړ رتبه او غوره استاذانو له جملې څخه دی او په اداري برخه کې د خورا ښې تجربې لرونکی دی.
د نوموړي د معرفت په مراسمو کې د پوهنتون علمي مرستيال سربېره د محصلانو او اداري چارو مرستيالانو هم ګډون درلود، چې ښاغلي شکيب ته یې د ياد معاونيت په چارو کې د بريالیتوب او موافقيت غوښتنه وکړه.
