له کتاب سره مينه تر نوم لاندې د فوټبال سياليو پای لوبه ترسره شوه.
چهار شنبه د ۱۴۰۳ هـ.ش کال د عقرب مياشتې ۹مه، چې د ۱۴۴۶ هـ.ق کال د ربيع الثاني مياشتې له ۲۷مې نېټې سره یې سمون درلود، شيخ زاید پوهنتون کې (له کتاب سره مينه) تر سرليک لاندې د فوټبال سيالۍ چې څه موده وړاندې ترتیب شوې وې، پای لوبه یې د طب او اقتصاد پوهنځیو لوبډلو تر منځ تر سره شوه. د پای په مراسمو کې د محصلانو چارو مرستیال پوهنیار مجاهد همت یار سربېره، استادانو او محصلانو ګډون کړی و.
يادو سيالیو کې ۱۴ لوبډلو ګډون کړی و او پایلوبې ته د طب او اقتصاد پوهنځیو لار ومونده، چې د طب پوهنځي لوبډله وتوانيده چې اقتصاد پوهنځي لوبډلې ته یو د صفر پر وړاندې ماتي ورکړي او د سیالیو اتلولي په خپل نوم کړي.
په پای کې غوره لوبغاړو او ګټونکې لوبډلې ته مډالونه، ستاینلیکونه او جايزې ورکړل شوې.
يادې سيالۍ د محصلانو چارو معاونيت له لوري ترتیب شوې وې، چې شاوخوا شل ورځې یې دوام درلود، د سيالیو ترتیبونکو په وینا، چې د دې سيالیو څخه يې هدف د محصلانو ترمنځ پېژندګلوي، له کتاب سره لا ډېره مینه، تفريح، ذهني ارامتيا، درسونو ته د محصلانو هڅول او د يووالي فضاء رامنځته کول و، محصلانو د دغه سيالیو څخه خوښي څرګندوله او فوټبال يې د صحت او ذهني سکون لپاره ګټور ورزش وباله.
نشراتو او عامه اړیکو آمريت
