د اعتبار ساتنې د چوکټ معيارونو توضيح درې ورځنی سیمينار پیل شو.
نن سه شنبه د ۱۴۰۳ هـ.ش کال د زمري مياشتې ۱۶مه، چې د ۱۴۴۶ هـ.ق کال د صفرالمظفر مياشتې دویمې نيټې سره سمون لري، شيخ زايد پوهنتون کې د لوړو زده کړو وزارت تضمين کیفيت او اعتبار ورکولو رياست له لوري د اعتبار ساتنې د چارچوب معيارونو توضيح درې ورځنی سیمينار پیل شو.
د قرآن الکريم څو مبارکو آیتونو له تلاوت وروسته د شيخ زايد پوهنتون رئيس شيخ الحدیث مسلمين راشد په خپلو خبرو کې وويل: ((عصري علوم دنیاوال هم کوي او مونږ هم؛ خو د علم حاصلولو مقصد باید د دنیا او اخرت
نیکمرغي وي، علم هغه وخت مثمر او عبادت ګرځي چې نيت ورته صفا وي.))
نوموړي وویل:((دين هم د کيميت په پرتله کيفيت ته اعتبار ورکړی دی.))
د لوړو زده کړو وزارت څخه د راغلي هيئت مشر او د پروګرامونو د اعتبار ورکؤنې آمر مولوي عبدالروف فروتن په خپلو خبرو کې وویل:((د تضمین کیفیت پروسه په اسلام کې واضحه ده، د پیغمبر صلی الله علیه وسلم ژوند،
اصول او تګلاره یې روښانه څرګندونه کوي.))
ښاغلي فروتن زياته کړه چې لوړو زده کړو وزارت د پوهنتونونو د ستونزو، مشکلاتو او نیمګړتياوو ته په کتو د حل په موخه سيمينارونه دايروي، تر څو پر بنسټ یې يادو ستونزو ته حل ومومي.
ورپسې استاد پوهنمل محمد امين، پوهنمل قدرت الله ځواک او دوکتور محمد داود احمدزي د سند ساتلو د پروسې معرفي او د نوموړي چارچوب لنډه شرحه، د پوهنتون په سطحه د سند ساتنې اول، دویم، درېيم او څلورم معيارونه
توضیح کړل.
ياد سيمینار د شيخ زايد پوهنتون د کیفیت لوړونې آمريت او د مسلکي پرمختيا مرکز سره په ګډه همکارۍ ترتيب شوی، چې درې ورځې به دوام وکړي.
نشراتو او عامه اړیکو آمريت
