د ریس پیغام

د شيخ زايد پوهنتون د ژبو او ادبياتو  پوهنځى د رئيس پيغام

د ژبو او ادبياتو پوهنځى په ١٣٩١ کال کې د شېخ زايد پوهنتون په چوکاټ کې نوى تاسيس او په مستقل ډو ل يې د نورو پوهنځيو په شان خپلې علمي او اداري چارې پيل کړې دي. دا چې د  پښتو ادبياتو څانګه د ښوونې او روزنې پوهنځي په چوکاټ کې پخوا فعاله وه، په ١٣٩١ کال کې د هغه پوهنځي څخه جلا او د ژبو او ادبياتو په پوهنځې کې يې فعاليت پيل کړاوس مهال دا پوهنځى ٤ څانګې (پښتو، دري، انګليسي او  اردو) لري. د ژبو او ادبياتو پوهنځي د تاسيس موخه دا ده چې هر انسان د ژبې زده کولو ته ضرورت لري، ځکه ژبه په عموم کې د افهام او تـفهيم وسيله ده. دا چې په نړۍ کې د ٤٠٠٠ څخه زياتې ژبې شته ، چې ځينې يې مړې او ځينې يې اوس هم کارول:  کيږي. 1969)  :  (Hill,A.

  که څه هم دا به ډېره سخته خبره وي چې يو څوک دا ټولې ژبې زده کړې، خو  لازمه ده چې د هېواد ملي او محلي ژبې زده کړي. په  ځانګړي ډول د پښتو او دري ژبو زده کول هر افغان لپاره  حتمي ده، او د هغه چا لپاره چې د ژبو او ادبياتو پوهنځى څخه د  متخصص او يا ښوونکي په توگه  فارغيږي.

د ژبو او ادبياتو پوهنځى چې نوى تاسيس شوى دى، ستونځې او مشکلات به لري، خو زما هيله دا ده چې ددې پوهنځى اداره، استادان  او محصلان په گډه داسې هلې ځلې وکړي ، تر څو په دې ټولو مشکلاتو بر لاسي شي. همدارنګه دشېخ زايد پوهنتون د رياست مقام څخه هيله کوو چې ددې پوهنځى د مشکلاتو د حل او پرمختګ لپاره  زموږ سره مرسته وکړي.

 

الحاج پوهندوى سيد کريم شاه  نېکمل

د ژبو او ادبياتو پوهنځى رئيس

بيــو گرافــي

الحاج  پوهندوى  سيد کريم شاه نېکمل په ١٣٥١ لمريز کال کې د خوست غرغښت ليسې څخه فارغ شوى او دوه کاله مې په  ننګرهار عالي  دارالمعلمين کې تحصيل کړى دى. د فراغت وروسته مې  په غرغښت ليسه کې  ٣ کاله د انګليسي ژبې د ښوونکي په توگه وظيفه اجرا کړې ده. په ١٣٥٥ کال کې  مې په کابل کې  په  American English Language Center   کې ٣ مياشتنى سکالرشيپ  د انګليسي ژبې عالي کورس لپاره  او په ١٣٥٦ کال کې مې په  کابل کې په British  Council   کې ٣ مياشتنى سکالرشيپ د انګليسي ژبې عالي کورس لپاره تر لاسه کړي دي. په  ١٣٥٦ کال  کې انګلستان ته  د لوړو زده کړو لپاره واستول شوم  او په سکاټلنډ، ادنبورگ ښار کې مې  په  Moray House College of Education    کې  د انګليسي ژبې تحصيلي ديپلوم تر لاسه کړ. لوړ تحصيلات مې په کابل پوهنتون،  لندن  او هندوستان کې د ماسټري درجې په کچه سر ته  رسولي دي.

په ١٣٦٠ کال کې د کابل پوهنتون د ژبو او ادبياتو پوهنځي په  انګليسي ديپارتمنت کې  په علمي کادر کې  شامل او د انګليسي ژبې د استاد په صفت مې وظيفه اجرا کړې ده.  په  ١٣٧٨ کال کې هندوستان ته  د تحصيل لپاره   وليږل شوم او د هند حيدراباد ښار  CIEFL  څخه مې دانګليسي ژبې ديپلوم تر لاسه کړ. کله چې مجاهدينو په ١٣٧١ کال کې کابل اشغال کړ، نو زه خوست ته راغلم او په ١٣٧١ کال کې مې د افغان انګليسي ژبې مرکز  تآسيس  او د  IRC   انګليسي ژبې پروگرام مې پکې  پيل کړ. په دې علمي مرکز کې مې د ١٨ کلونو په موده کې تقريباً پنځوس زره  (٥٠٠٠٠)  شاگردان  روزلي دي.

کله چې  افغان پوهنتون له پېښور څخه خوست ته را انـتقال  شو ، لومړنى استاد زه  وم  چې تدرسي او اداري چارې مې  ترتيب او تنظيم او په تدريس مې پيل وکړ  کوم چې اوس د شېخ زايد (خوست) پوهنتون په نوم ياديږي.  په ١٣٨٩ کې  نوي ډهلي (هند) ته يو مياشتنى  سکالرشيپ  راکړل شو او په  Institute of Applied Manpower for Research     کې د  International Training Program on Human Capabilities   تر عنوان لاندې پروگرام مې تعقيب او  يو تصديق   (Certificate)  او د  برونـزو  يو مډال مې تر لاسه کړ.

سر بېره پردې مې د هېواد په داخل کې په مختلفو اداري او تربيتي پروگرامونو  لکه: کنفرانسونو، سمينارونو، ورکشاپونو  او تحصيلي نصاب په جوړولو کې برخه آخستې ده. علاوه پردې، دخوست ولايت ځوانانو، قومي مشرانو، علاماوو،  ولايتي ادارې او د  شرايطو په  غوښتنه مې  په ١٣٩٠ کال کې پامير لوړو زده کړو مؤسسه ( پامير خصوصي پوهنتون ) چې په جنوب شرق زون کې لومړنى خصوصي پوهنتون دى ، تآسيس کړ.  په پامير خصوصي پوهنتون کې اوس مهال ٤ پوهنځي (اقتصاد، کمپيوټر ساينس ، ژبو او ادبياتو (انګليسي ديپارتمنت) او حقوق او سياسي علوم فعاليت لري. دا پوهنتون د افغانستان د لوړو زده کړو وزارت  سره په   (٤٠\٧٢) شمېره  او ٢٩\١\١٣٩٠  نېټه د رسمي جواز په صادرولو سره ثبت شوى دى.

اوسنۍ وظيفه:

د شېخ زايد پوهنتون دژبو او ادبياتو پوهنځى رئيس، د انګليسي ديپارتمنت آمر، د پوهنيزې مجلې مدير او د پامير لوړو زده کړو مؤسسې مؤسس او مشاور.

علمي اثار:

١.  لس علمي  مقالې ، د پوهنې وزارت، د عرفان په مجله کې.

٢. شپږ علمي تحقيقي مقالې ، د شېخ زايد پوهنتون په  پوهنيزه مجله کې.

٣. پنځه علمي تحقيقي اثار (کتابونه) د مختلفو علمي ترفېعاتو لپاره. 

٤. د شېخ زايد پوهنتون د ډېرو استادانو او محصلانو د علمي چارو لارښوونه  لکه: سمينارونه، مقالې، مونوگرافونه، علمي تحقيقي کتابونه، ترجمه او تآليف کې فعاله  برخه آخيستې ده.